كۆبونه‌وه‌كه‌ی په‌رله‌مان بۆ سبه‌ینێ دواخرا دوای ئه‌و هه‌ڵوێسته‌ نیشتمانییه‌ی ئه‌ندامانی فراكسیۆنی گۆڕان له‌ نێو په‌رله‌مانی كوردستاندا نواندیان بۆ پارێزگاریكردن له‌ به‌رژه‌وه‌ندی هاوڵاتیان و ئه‌نجام نه‌دانی كاری نایاسایی به‌رامبه‌ر به‌ په‌رله‌مانتاران و ناڕه‌زایی خۆیان ده‌ربڕی و به‌ مێزه‌كانیاندا كێشا، سه‌رۆكایه‌تی په‌رله‌مان بڕیاریدا به‌ دواخستنی دانیشتنی په‌رله‌مان بۆ یه‌ك سه‌عات و دواتریش كۆبونه‌وه‌كه‌یان دواخست بۆ سبه‌ینێ. ئیسماعیل گه‌ڵاڵه‌یی، ئه‌ندامی فراكسیۆنی گۆڕان له‌ په‌رله‌مانی كوردستان، به‌ سبه‌ی‌ راگه‌یاند: ویستیان قایلمان بكه‌ن بۆ ئه‌وه‌ی ته‌نها 3 خوله‌ك قسه‌ بكه‌ین له‌سه‌ر بودجه‌یه‌ك كه‌ بڕه‌كه‌ی 10 ملیار دینار (11 ملیۆن دۆلار) بێت و ئازادیمان لێ زه‌وت بكه‌ن و دیفاع له‌ به‌رژوه‌ندییه‌كانی خه‌ڵك نه‌كه‌ین و ئه‌و گه‌نده‌ڵییانه‌ی له‌ بودجه‌دا هه‌یه‌ ئاشكرای نه‌كه‌ین، ئێمه‌ش به‌وه‌ رازی نه‌بوین، هه‌ر بۆیه‌ ناڕه‌زایی خۆمان ده‌ربڕی و كۆبونه‌وه‌كه‌ دواخرا بۆ سبه‌ینێ. ئیسماعیل گه‌ڵاڵه‌یی، وتیشی: لیستی هاوپه‌یمانی ده‌یانویست ره‌زامه‌ندبن و ده‌نگ بده‌ن له‌سه‌رئه‌وه‌ی هه‌مو په‌رله‌مانتارێك ته‌نها 3 خوله‌ك قسه‌بكات له‌سه‌ر بودجه‌یه‌ك كه‌ چه‌ندین لایه‌نی تاریك و كێشه‌ی تێدایه‌. Monday, February 22, 2010